ہم بلاگرکیوں نہیں بن سکتے

اُردوسوشل میڈیا سمٹ  کی آمدآمد ہے اور پورے پاکستان بلکہ دوسرے ممالک سے بھی بلاگر پر تول رہے ہیں موضوعات اور مکالمات کی تیاریاں ہیں- ہم نے کبھی بلاگ نہیں لکھا

لیکن اُردوسوشل میڈیا سمٹ کے جوش میں بلاگربننے کی ٹھان لی ہے- یوں تو ہمارے دوست رزنین نے ملکہِ جذبات سے موسیقی کی باقاعدہ تعلیم حاصل کی لیکن اپنے فن کا مظاہر نہیں کیا اور

بلاگ چلانے لگے ایسے ہی کاشف اکرم وارثی بھی کچھ فنون سیکھنے کے باوجود میدان میں نہیں اُترے بلکہ بلاگر بن بیٹھے جس سے یہ ثابت ہوتاہے بلاگر ہونا یقینی اچھا اور معتبرکام ہے-

ان مذکورہ بالا صاحبان کی نجی محافل میں پرفارمنس کی ایک آدھ وڈیو یوٹیوب پرتلاش کرنے سے مل جاتی ہے ، یوٹیوب کی پاکستان میں بندش پر یہ دونوں حضرات خوش ہیں کہ ان کی بلاگری

کو ہی ان کا اول وآخر فن سمجھا جارہا ہے – ہمارے اور بھی کئی دوست بلاگ لکھتے ہیں اور ہم ان کی شہرت کو دیکھ کر اس شعبے میں قسمت آزمانے کا ارادہ کرچکے ہیں-

ہمارے ایک  اور دوست جو آئی ٹی  کا بلاگ لکھتے ہیں فرماتے ہیں لوگ ان کا بلاگ تکیہ لگا کہ پڑھتے ہیں ہم سمجھ گئے لوگوں پہ ان کا بلاگ پڑھ کر نیند کا غلبہ طاری ہوجاتاہوگا اور وہ تکیہ

لگاکے سوجاتے ہوں گے – ہم نہیں چاہتے کے آپ ہمارابلاگ تکیے یا پیسے لگاکرپڑھیں بس عینک اور دھیان لگاکرپڑھیں اور تبصرہ بھی فرمائیں تاکہ ہماری حوصلہ افزائی ہوسکے اور ہم

مزید لکھ سکیں – اگرچہ ہم گفتار کے تو غازی مانے جاتے ہیں لیکن اب انگلی کٹا کرہی سہی لیکن  تحریر کے شہیدوں میں نام لکھوانے کی خواہش ہے-

یوں ہم فنوں لطیفہ کی کسی  شاخ کوبھی اپنا سکتے ہیں لیکن وہاں پہلے ہی ہر شاخ پہ کوئی نہ کوئی — بیٹھا ہے جس کی وجہ سے لوگوں میں گلستانِ فنون لطیفہ کے انجام پر تشویش

پائی جاتی ہے اور ہم اس میں مزید اضافہ نہیں کرسکتے -بلاگ لکھنا ہمیں رکشہ چلانے جیسا لگتا ہے اپنی دھن میں مست خراماں خراماں اُڑاے جانا یعنی اپنی ہی کہے جانا کوئی 

تبصرہ پسند نہ آئے تو حذف کیا اور اپنی راہ پہ گامزن -آج کل یوں بھی اُردوسوشل میڈیا کا سین آن ہے – اُردو سوشل میڈیا سمٹ کراچی میں منقعد ہورہی ہے

اورہم اس سنہرے موقع کو ہاتھ سے نہیں جانے دینا چاہتے اور خود کو بلاگرکہلوانا اور اپنے شہروالوں کو اپنا مزید گرویدہ وشیدا بنانے کا اس سے بہتر وقت بھلا اور کون سا ہوگا- 

بلاگ لکھتے رہے تو کوئی تمغہ وغیرہ بھی حاصل کرسکتے ہیں یوں بیٹھے بٹھائے ملک کو قوم کا نام روشن کرڈالیں گے –